الأحد، 23 نوفمبر، 2008

أيوة بحبك




أيـــوة بَحِبك هـــى بـــدَايتى

أول كلمـــة فـى كل حكايتى


بَرْسم بيها ملامــح ذكــــرى


شايفه عيونك فيها مرايتى




أيوة حبيبى خلاص سَمِّيتك


جوه القلـــب أوام خبيــــتك


وإن تاهت سكـــة أحـــلامك


أنا وعيونى حنفضل بيتـــك



أنـــا ببنيـــلك فيـــا بيــــوت

تفضل ليك ولحد مـــا أموت


علشــانـــك وبحُبــَـــك ليــــا


حتعيشلك لو عمرى يفــوت



حبــك مـش دقــة وحســاها


ده أنا حسيت بالعمـر معاها


حسيت بالدنيــا وحلاوتـــها


وسنين انا عايشة مفارقاها


لما تكون عينك فى عينيــــا





أحلامــى بتصبـــح حقيقيـــة

بعشق تفاصيلك وجنونــك


وساعـــات بتاخدنى الجديــة



ابنــى بحســك وانت بابايا


وبشوفـــك مـــولود جوايــــا


وصحابى عيونك أخدونى


للفرحـة طول ما انت معايـــا



اوعدنى حتفضل علشانى


قلـــبى فى حبــــك أصله أنانى


وحنانك دقاتــه وروحـــه


وانا حفضل ارويـــه بحنــــانى








الجمعة، 21 نوفمبر، 2008

أسفة..خاص جداً

أسفة






آسـفة لكل دموع نزلتلك

آسفة إن كنت فى يـــوم حنيتلك


كنت فى يوم للقلب حبيب


يــاما بكـل الشــــوق غـنيتـلك




يـاما سهرت ويـاما بـكـيت

صنت لحبـــك أجمــل بيـــت


ياما عيون فى الحب نادتنى


وأنا لعيونك بـــس نـاديــت




آســفة لحــبى بكل كيانـى

آسفــة إن انا خبيــت أحزانى


خفت دموعى تشوفها عيونك


ينـــزل دمعــك يوم علشانى




حبك كــــان لحيـاتى الــجنة

وانا ولا مــرة معـــاك بتهنى


لكن كنت بشـــوفك فيــا


حــب عشــانه كتير بستنى




لُومْنى كمان على حب جنونى

اجرح واخلِف كل ظنونى


يمكن روحى تفـــارق حبـك


يمكن صورتــك تنســى عيونى




عمر القلب ما تـــاه فى كلام

على دقـــــاتك كــــــان بينام


عمره مـــا جـرّح قلب آمنله


وانـــت قتلـــت الحــب أوام




آسـفة بقولـها فى آخـر يـوم

قلبـى فى حبــك كــان مظلوم


وده كــــان ذنبه وذنب عيونه


وانا حلـفـته علـيك مايــلوم




لكن أغـــرب حاجـــة حقولها

لـما كرامتى الجرح يطـــولها


واما بلاقـى الدنيا تلومك


((قلبى مسامحه)) لسانى يقولها




ومضيت...

ومضيت



ومضيت...

أبحث عنك في الطرقات

في لهفة طفل

يشتاق لحلو الكلمات

في نور الشمس

يصرخ في كل الظلمات

في صمت غامض

تخترقه أسمى الكلمات

في لحن الحب

فوجدتك أنت النغمات

ومضيت

أبحث عن قلبك في قلبي

فتراني أبحث عن قلبي

عن وطن أسكنته حبك

أسكنته نورا في دربي

أنقذني من غدر رياحي

أهداني أحلى النسمات

* * *

ومضيت

فوجدتك تستوطن نفسي

تهديني اليوم

تسرقني من ظلمة أمسي

تسكن أحلامي

تشرق بلقائك شمسي

لا تتركني

لليال تملأها الأنات

وأعود لبحثي في الطرقات

* * *

أحببتك أنت

لم أعشق يوما أحلامك

أحببتك أنت

لتكون حياتي أيامك

وأخاف عليك

من حربي تخترق سلامك

و أغار حبيبي

من صمتك من كل كلامك

و أغار أغار

من شئ تحمله النظرات

و أضل طريقي في الطرقات

* * *


أما إن خنت

سأميت القلب بأحشائي

و سأصمت في نفسي ندائي

إن كنت نعيما لحياتي

سأودع زمن الجنات

وأسير و نار الطرقات

الخميس، 20 نوفمبر، 2008

رباعيات مسافرة(40)


شنطة سفر جايبــة جواها جوايا


جايالى من بحرى على شط مرسايا

قبل النهار مايبان انا لازم أتوضا

وأصلى فجر جديد يرسملى دنيايا


وعجبى ..!!

رباعيات مسافرة (39)


يا عصفور الهوى فى قلبى


يا ذنب ماكانش يوم ذنبى


فى بعدك ياما عاشلى الويل


واعيشله لو تكون جنبى



فى بعد وقرب.. بقول عجبى.!

رباعيات مسافرة (38)


قلبك ضعفك أوعى تسيب نفسك وياه


ياما يسافر ولا تعرف امتـــى حتلقاه


واما ف لحظة بتتلاقوا على شط غريق


بتخاف من ضعفه وبتخاف من مر قساه


وعجبى.!!

رباعيات مسافرة (37)


قلبى انفطر لاجل الهوى نصين

نص انطرد من جنة العاشقين

وبنص تايه راح أكمل سكتى

وياريتنى عارف النهاية لفين

وعجبى..!!

رباعيات مسافرة(36)


لملمـــت أوراقى اللــــى ياما كتبتها

ومسحت ذكرى قلبى كان بيعيشلها

وكتبت كلمة بيها راحت خطوتى

توصل نهاية سكة كنت رسمتها

وعجبى..!!

رباعيات مسافرة(35)


قبل امـــا نمشى ليا عنــــدك كلمتين

وعشانــها عشنا عمرنا متغــــربين

حبك حكـــاية قلبى كان بيعيشـــلها

سكة ورجعنا منها احنا المجروحين

***

وانا بوعــــدك انت ومــــلامحـك

قلبــى انـــا يفضــــل مســــامحـك

ماهــــو أصـــل قلبــى م البدايـــة

بتموتـــه الأيــــام فــى جرحـــــك



وعجبى..!



رباعيات مسافرة (34)



التوهة سارحـــة جــــوه جــــوانا

لا الغدر موتنا ولا ظلمـــه نســـانا

اياك فى يوم تحلم أرجع هنا تــانى

علشان زمان غدرك ع الحق رسانا

وياويلى من العجبى

رباعيات مسافرة (33)


قَريب أو كنت عنى بعيد

هواك كان وهم بالتأكيد

لا عمرك كنت ليا فى يوم

ولا غدرك عليا جديد

***

ومهما حيوحشك قلبى

وحتحاول تكون جنبى

انا مش عايزه يوم القاك

ولا بيك أفتكر ذنبى


ويا غربة بلا عجبى

رباعيات مسافرة (32)


يا توهة سايبة ألف جرح والف آه

خلتنى انسى الصدق واللى مصدقاه

علشان كتير بستغرب النور اللى انا

خلانى عايشه جوه ليل مستنياه


وعجبى


رباعيات مسافرة (31)


ياغربة واخدة حتة غالية مننا

قلب الوطن اللى انهزم من ضعفنا

ومعاكى ضاع كل الحنان من أوله

ماهو أصله راح الحضن اللى يضمنا


وعجبى..!!

رباعيات مسافرة (30)


أنا طير ولكن مش برئ

على شطى آه لكن غريق

والجرح فاق كل الحدود

والغدر ساكن كل شئ



***

لما الغيوم تملا السحاب

والفرح يشكيلنا الغياب

تلقى القلوب متجمعة

طالبة الأمل على كل باب

***
الحلــم لــو قادر ياريت

يبنيلنا فرْح فى كل بيت

ماهو أصل لو مات الأمل

انا كنت م الدنيا اتنسيت


وعجبى..!!


رباعيات مسافرة (29)



يا خطوة راسمة سكتى

مشوار بعيد عن دنيتى

الفرح ليه تاه عننا

والحزن أصبح قسمتى

وعجبى..!!


رباعيات مسافرة(28)

عريان يا قلبى والغطا كان من تراب

ويادوب بقطرة الندى على جلدى داب

ازاى تفكر انه يحميك من شتا؟

حتى المطر كان يوم مفارق للسحاب


وعجبى..!!

رباعيات مسافرة (27)



لما الشتا يـــدق البـبان

على قلب كان طيب زمان

يغســـل ذنــوب متجمعة

مرسومة على كل الحيطان

***

لما الشتا بيعود هنا

مكان ماشفنا بعضنا

بنساك أنا مع كل لحظة

كانت زمان بتضمنا

***
وقت أما جمعنا الشتا

انا كنت بيك متكلفتة

وعرفت لما البرد زاد

إن الغطا كان من شتا


وعجبى..!!


رباعيات مسافرة (26)



مليون وش وفين العملة

أصل الغدر ده كان بالجملة

وش ملك على عرش الحب

يضحك..يعشق..بس مجاملة

***

وش كتبنا عليه احزاننا

فاكرين مُره يحلى زماننا

نجرى عليه ونطير وياه

بس وقعنا وقبل أواننا

***

وبين الاصل وبين الصورة

ماسكين مراية و مكسورة

تايهين فى زحمة ايامنا

بقلوب مريضة ومسحورة


وعجبى..!!


رباعيات مسافرة (25)


بفرح أوى انا بفرح جداً
لما عليه أنا أبطل أحزن
اصلى خلاص راح ابص لبكرة
واعشق اللى بقلبه الاحسن

بلا عجبى..!!

رباعيات مسافرة(24)



صباح مليان محبة وخيرعلى ناسى

صباحى له واحساسه فى احساسى

يا دنيا ازاى انا شفتك بعين تانية

وياما مليت من القسوة كتير كاسى

***

صباح عشته زمان سارقانى سكينتى

بنضاره تسَوِد وَردى فى جنينتى

وانا دلوقتى شايلاها وانا صادقة

وبعيون الهوى بَرسم هنا حكايتى


ومن غيرها بقول عجبى..!!



رباعيات مسافرة (23)


لـــو قلت انى بعشقك أكدب أوى
لــــو قلت إنى بكرهك حظلم أوى
بس الجراح على قد ما بتهزم آمالنا
بتخلى قلبك على الألم يصبح قوى

وعجبى..!!

رباعيات مسافرة(22)


اسكت كفاية كدب عندى بيدبحك
مليون حكاية وكل حرف بيمسحك
يمكن سكوتك يوم يخفف صدمتى
وجراحى تفضل خايفة مرة لتجرحك

وعجبى..!!

رباعيات مسافرة(21)



صفحة وبايدى انطوت علشان ماتهمنيش
حتى إن عيونى بكت دى دموع ماتهزنيش
خـــرجتك مـن حياتى من غير ما أموتك
ماهو برضه يهمنى قلبى اللى فيك يعيش

وعجبى..!!

رباعيات مسافرة (20)



يـاااه ع الضحكة دى لما تخبى جراح وألام
يــاااه ع الفرحــة اللى بتتكسر فى الاحــلام
أصعــب دمعة اللى تخبيها عشان ماتبانش
واللحــظة اللى تمــوت فيـــك كل الأيــام

وعجبى..!!

رباعيات مسافرة(19)




ممكن أصدق ان الشمس فى قلبى تغيب

ممكن أخلى الحزن خلاص يبقالى حبيب

صعب أصدق ان عيونك كانت كدبة

نظرة..وهمسة..وكلمة تخلى الجرح يطيب

***

جايز ان النور كان خادع فيا نهار

جايز ان الجنة دى كانت أصعب نار

بس ازاى العين دى بتقدر تخدع قلبى

ازاى كانت لحن بدون أغلى الأوتار

***

غاب الصدق فى أجمل لحن بيتغنالى

ضاع الحق وضعت انا لما الوهم نادالى

انا فكرت ان انت ملاك طاير فى هوايا

بس ده كان وهمى اللى زمان عشت بيحلالى



وعجبى..!!

رباعيات مسافرة(18)



شــط هــادى انـــا التـقيته بالصفــا

لمــــا قـــلبى بالجروح كـــان اكتفى

انا مش راح ادخل يوم بحورك يا هوى

ده انت عمـــرك ما سكـــــن قلبك وفا


وعجبى..!!

رباعيات مسافرة (17)


دور عليا فى الشــوارع فى مخارج البيوت

يمكن تلاقى نبرة تنطق من سنابل السكوت

بص فى مراية تلقى عين تشبه عيونى

لكن عينيا مش حترجع حتى لو عاشت تموت



وعجبى..!!

الثلاثاء، 18 نوفمبر، 2008

رباعيات مسافرة (16)

مراية وتايهة كتير فى الملامح

وش بيحضنك ووش قاسى وجارح

وحـــاير تفـــرق مــا بينهم يا قلبى

لا قاسى بقيت ولا انت قادر تسامح

وعجبى..!!

رباعيات مسافرة (15)



يا دنيا اسرقى فينا

وشيلينا وحطينا

ولكن فى النهاية ميعاد

نسيبك فيه وتنسينا

***

يا عمر واخدنا فى الزحمة

بيطلب مننا الرحمة

ياعالم ليه تخلونى

بلا احساس ولا رحمة

***

ولا احنا يوم سمعناله

وفاكرينها حتبقاله

ده لو دامت لسلطانها

ماكنش فقير أخد ماله


وعجبى..!!

رباعيات مسافرة (14)


يــا عمر ليــــه ماشــى وللحيـــاة سارق

اطلب مـــا تــدينى ولفـــرحتى خــانـــق

يــــــا دنيــــــا ليــه قادرة تبنيلى أحلامى

قصور ماليها الخوف وانا ليها راح أفارق

***

ممنوع عنى الفرح والحب والابتسام

حتى صوت الألم ممنوع من الكلام

ممنوع حضن الوطن فى غربة الحياة

بس الشجن قادر يعيش وسط الزحام

***

يا غربــة واخدانى لبر مالــوش أمان

الحــــب بستانى لكــن صبح عطشان

القطر راح يمشى فايت ف قلبى جراح

مش بس حيسيبنى لكـــن حسيبه كمان


وعجبى

رباعيات مسافرة (13)




يابحــر دلــوقتى جاية وانا بجرى

.

وسبتلك مركـب طابقة على صدرى

.

حــرة ماليا شراع ولا ليــا حـدوتة

.

يغزللى منها الألم تاج فيا كان يهرى

.

وعجبى..!!

رباعيات مسافرة (12)

يارب بدعيلك خايف ما تسمعنى
علشان انا قلبى م الذنب واجعنى
بس انت سبحانك ارحم من الرحمة
حتى ان فى يوم ظلمى عنك بيمنعنى
.
***
.
يـارب يـا عالم يـــاخالقلنا الاكوان
مش بدعى ع الظالم ماهو للأسف انسان
وانا زيى زيه جروح مليانة بالغربة
وساعات بيملكنى الشر زيه كمان
.
***
.
يارب اهدينى خيرى وشرى منين
قربنى من دينى اللى نسيته سنين
قوينى ع الاحزان اللى ملت عمرى
واكفينى شر قلوب ماشية ماتعرف فين
.
وعجبى..!!

رباعيات مسافرة (11)

ألف طعنة موتتنى ومت فيها
.
ألف طعنة هونتنى وهان عليها
.
بس أصعب حاجة لما الطعنة تيجى
.
م العيون اللى انت يوم اشتاقت ليها
.
وعجبى..!!

رباعيات مسافرة (10)

يا غالى مين رخصك والبيعة بخســارة
.
حواليك ياما الشبـــك وصبحت صـنارة
.
اسمع كلامى عشـــان يـــاما كتير قلته
.
بس انت سبت قصور وسكنت فى الحارة
.
وعجبى..!!

رباعيات مسافرة (9)


ممنوع من البكا يا قلبى يا جريح
.
ان كنت بتتقتل ممنوع انك تصيح
.
دى العين اللى بكت يا قلبى ف يوم عليك
,
شايفاك بتنتحر وبتدى ليك تصريح
.
وعجبى..!!

رباعيات مسافرة (8)

يا بلادى يا غربة واخدانى بالأحضان
.
ببعد أنا وانتى والاسم لينا مكان
.
لما المطر بيسيل على جرحى بتألم
.
وللا انتى فاكرانى عاشق لكل زمان
.
وعجبى..!!

رباعيات مسافرة (7)


أنا كنت آخر وتر على عودك العاشق

.

من بعدى كل البشر ع الحب تتسابق

.

أنا كنت غنوة أمل لكن كدب لحنك

.

ولا بعدى لحن الهوى يقدر يكون صادق

.

وعجبى..!!

رباعيات مسافرة (6)

يا عمرى أنا خنتك لما التقيت الموت
.
وبصمتى عيشتك صارخ بأعلى الصوت
.
لا جنونى راح يفنى لنهاية المشوار
.
ولا عقلى بيفكر ينطق بأى سكوت
.
وعجبى..!!

رباعيات مسافرة (5)


يا دنيا ليكى ألف شكل وألف لون
..........
فيكى الهوى على قلب عشاقك يهون
.
وقت الفرح الكل يملاكى بغنا
.
والجرح خلا القلب نابض بالسكون
.
وعجبى..!!
.
*********
.
الحب للاحزان وللا الألم للحب
.
تايهين مانعرف مين بره وجوه القلب
.
لو توهة واخدانا بتاخدنا للحيرة
.
حتى فى عز النور العتمة ماليه الدرب
.
وعجبى..!!

الجمعة، 22 أغسطس، 2008

رباعيات مسافرة (4)

(4)

جرح الحبيب


لما الجرح يكون من حد

أقرب اوى من اقرب حد

لازم تسكت بس عشان

جرحك فاق فى آلامه الحد

***

لما بكل بساطة يبيع

قلب فى حضنه صبحت رضيع

لازم تسكت بس عشان

جرحك أكبر م التطبيع

***

لما القلب بطعنة يموت

لازم يسكت ألف سكوت

مش علشان لسه بيتألم

بس خلاص مات فيه الصوت


وعجبى..!!

رباعيات مسافرة (3)

(3)


هتلر


دنيا وعايشه عشان ترجع تموتنا

القلب اللى ارتجع عن ذنبه سكتنا

والقلب اللى اتنسى تجرحنا أحزانه

حتى ان ف يوم ايده بالغدر جرحتنا

***

ياحياتى ورينى حتوصلينى لفين

هدينى وابنينى والاسم كده عايشين

لو كنت انا الغلطان حستنى منك قلم

على وشى يدينى معرفش جاى منين

***

أنا مش بطل نازى فاردلكم روحى

وان ذنبى احساسى استغفره بنوحى

ولا كنت ع المسرح بلعبلى عشرين دور

منا أصلى م الأول بقسى على جروحى


وعجبى..!!

رباعيات مسافرة (2)

(2)

قبل الوداع




يا اللى انت عُمر أنا التقيته بين خُطايا

لمــا صِغِـــر خَلا أنا يِصغَر معـــــايا

عمرى ابتدى يوم فرحتى بجنون هواك

والبُعــــد بَـرْسِم بِيه أنا لينا النهاية

***
جوايا كُنت صوت ضمير بيشدِّنى

ولقيت معاك ضَىّ القمر بيضُمِّنى

خَلِتْنى أكره حتى هَمْس الاشتياق

حتى الضمير مات يوم ما بِيه مَوتّنى

***
لو كنت زيى زى غيرى كنت قول

منا كنت ببعد واما كان بُعدى يطُول

تشتاق وانا وياك قَتَلنى الاشتياق

بس انت خلتنى مراية لقَلب غُول


***

يوم ما انطفِت شمعة لقانا بالدموع

انا كنت بطلب بيها مش عايزة الرجوع

وبقولها تانى ابتعد عن نور طريقى

بس نفسى ماتنتهيش عندى الشموع

***
لوكنت غلطة ادعى ربك تتغفر

لو كنت نزوة اوعى تانى تنكسر

بس انت عندى كنت عمر بعيش عشانه

وانا م النهاردة على السنين راح أعتذر

***
قبل الوداع انا عندى كلمة تهمِّنى

انا بعتذر ان كنت مرة جَرَحْتِنى

أقصد أقول إن كنت جارحاك بالهوى

أصل انت كان جَرحَك كمان بيهزِّنى


وعجبى

رباعيات مسافرة (1)

(1)
شنطة سفر

شنطة سفَر شايلة جواها جوايا

واخداها من بحرى ولشط مرسايا

يِمكن على بـَـرِّى تقــابلنى أفــراحى

حتى إن لقيت جرحى حَهديله غِنواية

وعجبى..!!