انا البلطجى

قوللى يا بيه؟
هى الثورة عملت ايه؟
شالت حسنى
امال مجلس عيلته ده ايه؟
اهتف يللا معايا يا بيه
عايز القى وطن يحمينى
ده انا دايخ طول عمرى عليه

***

عايز حقى يا سى الأستاذ
مش قصدى البنزين ولا غاز
أنا عايز لما أمشى قصادهم
متحدفش بطوب وإزاز

***

مش ذنبى يا بيه إنى فقير
ده انا زيى ف بلدنا كتير
وهدومى دى أصلا بقلعها
لما اتعب بفرشها سرير

***

بيقولوا انا صايع متشرد
وانا بس عليهم متمرد
مش راضى أمدلهم ايدى
والثورة ف قلبى بتجدد

***
ده انا ياما بالليل شدونى
وف أزبل زنزانة رمونى
وبطاقتى دى كانت ف جيوبى
أخدوها
وتحرى خدونى !

***
لو شنطة اتسرقت بتجاب
واتمرمط من نسر وكاب
وأنا أصلا ع التوكتوك عايش
ومليش ف الكار الهلاب

***
ده انا شوفت معاهم وقاسيت
وعشانهم أنا بيعت البيت
ماهو أصل كلابهم بتزورنى
تتطمن إنى اتعشيت

***
يجيبونى ف عز انتخابات
يدونى المعلوم شلنات
وانا لازم أقبل واطاطى
أو تصبح ليا ملفات

***
اكمنى انا لابس كستور
مش عايق ولا واد فرفور
وعشان مش لابس زييكم
كام تهمة بتتلفق زور

***
وعايزنى أثور بس ازاى؟؟؟
اعزفلك بجيتار أو ناى !!
ده انا حلمى أولع ف الماضى
وانا قلبى ما هواش نسّـــاى

بعثــرات 6

اسكندرية يا صبية
للبحــر تتعــايق
والخلايق رايحة جاية
وانا مركبك سايق
لو اسيبك تغرقى
بس اوعى تصدقى
ان ممكن نفترق
لو حتــى لدقــايق

بعثــرات 5

لو كنت بتعشق أشعارى
أنا راح اسيب الشعر وسيرته
انا مش حقبل يسكن دارى
الا أمير خلانى أميرته

بعثــرات 4

مش راح أصدق
لما تقوللى الأيام جايه
انا بستنى ساعات من وقتك
مع انك بتقوللى شويه
مش راح اصدق
لما تقوللى بحبك انتى
وانت بتعشق نفسك فيا

بعثــرات 3

لما الدنيا ف يوم تسود
وللا دموعك تملا الخد
اوعى تسلـم للأوجاع
أو تبنيلها ف قلبك سد

بعثــرات 2

لمـا الدنيـا ف يــوم تندهــلك
اوعى تطنش صوتها بجهلك
بـس إياك تجـرى وتحضننى
تطــلـع برضه بيتهيـــألـك

بعثــرات 1

كل القلوب الطيبة
راحت مع أيام الصبا
والقلب تاه وسط الزحام
مافضلش منه غير آلام
ودمعة منى قريبة